Honi buruz

Usurbilkultura.eus Usurbilgo kultur ekintzen erakustokia da. Usurbilen antolatutako ekitaldi edo ikuskizunak bistaratzea du helburu, eta, behar balitz, haietarako sarrerak lortu eta izen-emateak egiteko aukera ematea. Bertan topatuko duzun eskaintza zabala herriko erakunde, elkarte, eragile eta norbanakoen ekimenaren fruitua da.

Covid-19ak zeharo baldintzatu duen egoera honetan, antolatzaileok kultur ekitaldiak burutzeko protokolo zorrotza osatu dugu, unean uneko osasun-neurriak betetzea helburu. Herritarrei zentzuz eta tentuz jokatzeko eskatu nahi diegu, ekimen bakoitzaren inguruko argibideak irakurri eta begirunez jarrai ditzaten. Izan ere, norberarena ez ezik, guztion osasuna babesteko neurriak dira.

Neurri nagusienetarikoa ekitaldi bakoitzean bil daitekeen jende-kopuruarena da. Ezinbestean mugatu behar izan dugu parte-hartzaileen kopurua, horixe baita segurtasun-neurriak bermatzeko modu bakarra. Horretarako, ekitaldi bakoitzean zenbat jende bil daitekeen zehaztu dugu, betiere ahalik eta herritar gehienengana iristeko asmoz. Webgune honetan, hortaz, sarreren banaketa bidezkoa izan dadin nahi dugu, eta aukera-berdintasuna bermatu. Hori dela eta, bakoitzak eskatu ahal izango dituen sarreren-kopurua mugatua da. Banaketa, berriz, zozketa bidezkoa.

Zentzu horretan, ahalik eta jende gehienarengana heltzeko zenbait emanaldi streaming bidez zabaltzeko asmoa daukagu.

Usurbildarrek ekitaldietara joateko erabateko lehentasuna izango dute. Dena den, ekitaldiren batean ezarritako gehienezko jende kopuruak izena ematen ez badu, usurbildarrak ez direnei ere sarrerak eskuratzeko aukera emango zaie.

Oharra: konfinamendua arintzearen 3. fasea izan dugu oinarri segurtasun neurriak zehazteko. Neurriak eta aforoak aldagarriak izan daitezke, beraz, Normaltasun Berria deitu duten testuinguruan aplikatuko diren aldaketen arabera.

Zalantzak argitzeko: 943 37 19 99

 


NOLA ERABILI?

© 2020 Usurbilgo udala

Joxe Martin Sagardia plaza, z/g
20170 Usurbil, Gipuzkoa

Telefonoa: 943 37 19 51
Posta elektronikoa: kultura@usurbil.eus

Garapena eta diseinua: iametza